Tepora wala kakuha sa timbang, iyang title defense gikanselar

CEBU, Philippines —  Wala makuha sa Sugboanong kampiyon Jhack Tepora ang  saktong timbang hinungdan nga gikanselar ang gikatakda unta niining pagdepensa sa iyang WBA interim featherweight title sa undercard sa sangka nilang Manny Pacquiao ug Adrien Broner karong adlawa didto sa MGM Grand Garden Arena sa Las Vegas, Nevada.

Ang wa'y pildeng si Tepora (22-0, 17KOs) manalipod unta sa iyang bakus batok sa Mehikanong si Hugo Ruiz, apan  wala madayon  sobra kaayo sa timbang.  

Atol sa official weigh-in kagahapon, si Tepora mitimbang og 131.5   libras, sobra og 5.5  libras sa gitagana nga timbang ubos sa featherweight division.

Si Ruiz, nga mitimbang og 125 ka libras, makigharong na lang karon batok ni Alberto Guevarra sa usa ka non-title fight.

Ang beteranong promoter nga si Sampson Lewcowicz nga maoy manedyer ni Ruiz, maoy mirekomendar nga kansilahon na lamang ang away gumikan kay dili siya gusto nga irisgo ang panglawas ni Tepora. Kun idayon ang away, alanganin sab kaayo si Ruiz nga bag-o pang mitaak sa featherweight ug makigharong dayon ni Tepora nga usa na ka lightweight.

Gitataw hinuon ni MP Promotions head Joe Ramos, kinsa mao na karon ang promoter ni Tepora, nga ang iyang batos Tepora magpabilin nga  kampiyon ug makabalik ra kini sa labing dali nga panahon.