Desiderio mo-'debut' sa PBA

CEBU, Philippines — Masukod na ang abilidad sa Sugboanong point guard ug No. 4 pick  Paul Desiderio sa labing una niyang duwa sa PBA dihang ang Blackwater Elite moharong sa NorthPort Batang Pier karong adlawa didto sa Smart Araneta Coliseum.

Ang duwa sugdan sa alas-4:30 sa hapon.

Ang 6-foot-1 nga si Desiderio nimugna og kasikas sa miaging rookie draft dihang nakuha siya isip No. 4 sunod sa mga top prospects. 

Gibira siya sa NLEX Road Warriors, apan   nawala dayon sa koponan human siya malakip sa trade diin gihatag sa Blackwater ilang All-Star forward nga si JP Erram sa NLEX.

Si Desiderio naghinamhinam na hinuon nga mopakita sa iyang labok uban sa Blackwater nga iyang gihulagway nga usa ka batan-on apan lig-ong playoff contender sa season.

Gawas ni Desiderio, laing mga batan-ong prospects nga moduwa sa Elite mao sila si Fil-American ug Gilas cadet Abu Tratter ug Diego Dario. Wala pa gihapon ang No. 2 pick sa Elite nga si Ray Parks Jr.  kay  gitiwas pa niya ang iyang serbisyo sa Alab Pilipinas.

Sa main game sa alas-7 sa gabii, ang Meralco Bolts makig-harong sa Phoenix Fuel Masters.