Pacquiao larga na paingon sa Vegas

CEBU, Philippines — Gitapos na ni WBA welterweight champion Manny Pacquiao ang iyang training camp didto sa Wild Card Gym ug ang iyang tibuok team milupad dayon ngadto sa Las Vegas  alang sa iyang  title defense batok ni American star Adrien Broner karong Domingo didto sa MGM Grand Arena.

Si Pacquiao mipahigayon pa og light training uban ni Freddie Roach sa wala pa sila milarga paingon sa Las Vegas diin nagpaabot didto ang serye sa mga press conferences sa dili pa siya ug si Broner mosaka sa ring.

Ang suod nga higala ug trainer ni Pacquiao nga si Buboy Fernandez nagkanayon nga puno sa positibo nga enerhiya ang tibuok Team Pacquiao sa ilang pagbiya ug salig siya nga matuman ilang tahas pagtumba ni Broner.

Sama sa American trainer nga si Freddie Roach, si Fernandez misaad nga  tumbahon sa Pinoy ring icon si Broner sa sayong rounds. 

"Sabi ko sa kanya, engage kaagad. Huwag nang bigyan ng pagkakataon," matud pa ni Fernandez sa Philstar.com.

Sa laing bahin, grabe  ka 'underdog' si Broner batok ni Pacquiao kun     pustaanay ang basihan  didto sa Las Vegas. 

Ang mopusta og $230 ni Pacquiao makadawat lang og $100 kun  ugaling modaog ang Pinoy champion batok Broner.