Phoenix mibuhi sa No. 4 overall pick sa PBA draft

CEBU, Philippines – Mipakanaog og bug-at nga desisyon  ang  kadagkoan sa Phoenix Fuel Masters tulo ka adlaw  sa dili pa ang PBA Rookie Draft dihang ilang gibuhian ang ilang katungod nga mopili sa No. 4 overall pick.

Ilang gihatag ang katungod ngadto sa NLEX Road Warriors bugti ni veteran shooter Alex Mallari ug Dave Marcelo.

Makapakugang ang desisyon sa Fuel Masters ilabi na nga daghan ang mga masaarong players nga mamahimong pilian sa draft, apan nakita nila si Mallari nga mas makatabang sa ilang kampanya sunod season.

Una nang gipahibalo ni Phoenix coach Louie Alas nga kuhaon nila ang Fil-American bigman ug sakop sa Gilas cadets nga si Abu Tratter sa No. 4, apan nausab ang ilang desisyon.

Matud ni Alas nga lisud balibaran ang tanyag sa Road Warriors tungod kay gawas sa usa ka masaligang guwardiya, anaa usab si Marcelo nga makatabang kanila isip reserve bigman. 

Sa dili pa ang Phoenix, unang mopili ang Columbian Dyip, mosunod ang Blackwater Elite ug dayon ang NorthPort Batang Pier diin klaro  na nga makuha ang Fil-Ams nga sila si Ray Parks Jr., CJ Perez ug Robert Bolick.