Raptors midaog gihapon

CEBU, Philippines – Gipakita sa Toronto Raptors nga usa gihapon sila ka lig-on nga puwersa bisan og wala si Kawhi Leonard human ilang gilubong ang Los Angeles Clippers, 123-99 sa NBA kagahapon didto sa Staples Center sa Los Angeles, California.

Pipila ka oras sa wala pa ang duwa, gipahibawo sa Raptors nga dili makaduwa  si Leonard gumikan kay duna kini lain nga gipamati sa iyang hawak.

Gumikan niini, lagmit nga dili sab makaduwa si Leonard sa dihang sangkaon sa Raptors ang two-time NBA champion Golden State Warriors karong adlawa.

Kay wala si Leonard, misalida og maayo sila si Serge Ibaka ug Kyle Lowry nga nagkumbinar og 46 puntos sa Raptors nga wala na molingi pa sukad miposte og 36-23 nga labaw human sa unang kuwarter. 

Giinat sa Raptors ang labing nindot nila nga rekord sa liga ngadto sa 22-7.

Sa sayo pa, si James Harden miratsada og 29 puntos sa dihang gipakaging sa Houston Rockets ang Portland Trail Blazers, 111-103  aron putlon ang tulo ka sagunson nilang pilde.

Mihatag sab og kahayag sa Rockets si Chris Paul nga mihipos og 11 puntos, 11 ka rebounds ug 10 ka assists. Nagkupot na sila karon og baraha nga 12-14.

Didto sa San Antonio, si Spurs coach Gregg Popovich mitali sa ika-1,211 niyang daog human ilang gipilde ang Phoenix Suns sa iskor nga 111-86.

Si Popovich nahimutang na karon sa ikaupat nga puwesto sa listahan sa mga coach nga dunay labing daghang daog sa kasaysayan sa liga. Iya nang naapsan si Pat Riley, ang five-time NBA champion nga mikolekta og 1,210 ka daog sa iyang panahon isip coach.