Alaska motabla sa series
CEBU, Philippines — Determinado ang Alaska Aces nga mopilde pag-usab sa Magnolia Hotshots aron matabla ang ilang 'best-of-seven' finals series sa 2018 PBA Governors Cup karong gabii didto sa Smart Araneta Coliseum.
Mangtas nga mibangon ang Aces sa Game-3 diin ilang gilubong ang Hotshots og 30 puntos sa iskor nga 100-71 aron pagpabuhi sa ilang paglaum alang sa korona.
Sa maong duwa, ang import sa Aces nga si Mike Harris mipabuto og 36 puntos ug nanghinaut nga magpabilin ang iyang kainit karong gabii.
Matud ni Harris nga krusyal ang daog nila karon tungod kay kinahanglan nila likayan ang 1-3 nga pagkalubong nga mopanipis sa ilang tsansa sa Governors Cup title.
"This is one of those games that we needed to win," matud pa sa 6-foot-5 import sa PBA.com.
Si Aces coach Alex Compton nangandam na sa bangis unya nga pagbalik sa Magnolia ilabi na nga gipahamtangan nila ang Hotshots og usa ka makauuwaw nga kapildihan.
Gawas nga gusto niya masubli ang dominanteng duwa ni Harris, kinahanglan usab ni Compton ang pagtinabangay sa iyang mga lokal sama nila ni Vic Manuel, Chris Banchero ug Carl Bryan Cruz.
Sama sa gibuhat nila sa Game-3, ang pagpugong sa mga elite guards sa Hotshots nga silang Mark Barroca, Paul Lee ug Jio Jalalon ang mamahimong yawi sa ila unya nga kadaogan karon.
- Latest
