Pacquiao dili angay nga mokompiyansa
CEBU, Philippines — Dili angay nga mokompiyansa si Manny Pacquiao sa challenger niining si Adrien Broner sa giatngan nilang away nga maoy buena manong dalit sa kalibotan sa boksing sa tuig 2019.
Ang bugtong eight-division world champion sa kasaysayan gikatakda nga modepensa sa iyang WBA welterweight title batok ni Broner unya sa Enero 19 didto sa MGM Grand Garden Arena sa Las Vegas, Nevada.
Alang ni Justine Fortune, ang strength ug conditioning coach ni Pacquiao, ang Pinoy'ng kampiyon angayan nga mangandam lang sa usa ka dakong gubat kay dili basta-basta nga kontra si Broner.
Gawas nga beterano ug adunay halapad nga kasinatian, si Broner kanhi naghari sab isip usa ka three-division world champion.
Masaligon hinuon si Fortune nga kaya ra kaayong pakamangon ni Pacquiao si Broner gumikan kay mas kusgan ug mas bangis ang mga kinumo niini.
Nagkanayon si Fortune nga si Pacquiao kinahanglan nga mohimo og impresiyon gumikan kay duna kini punto nga pamatud-an sa iyang pagbalik og away sa Amerika.
- Latest
