Mavs mibuntog sa Trail Blazers

CEBU, Philippines — Nagkumbinar og 38 puntos sila si Luka Doncic ug Wesley Matthews alang sa Dallas Mavericks nga mibuntog sa Portland Trail Blazers, 111-102 sa NBA kagahapon didto sa American Airlines Center sa  Dallas, Texas.

Si  Doncic mi-iskor og 21 puntos, samtang si Matthews adunay 17 puntos aron pangulohan ang kadaogan.

Mitampo sab si DeAndre Jordan og 12 puntos uban ang  17 ka rebounds  sa Mavericks nga midaog og kasiyam sa katapusan nilang 11 ka duwa. 

Mao sab kadto ang ikawalo nilang sagunson nga daog didto sa ilang korte.

Nangu sa pilderong Portland mao si Damian Lillard nga miposa og 33 puntos.

Sa laing duwa, si Donovan Mitchell mikulit og 20 puntos ug si Rudy Gobert mikadlit og 18 puntos ug 10 ka rebounds alang sa Utah Jazz nga mipaluhod sa San Antonio Spurs, 139-105.

Mipakita usab og kasikas si Kyle Korver sa labing una niyang home game sa iyang pagbalik sa Jazz human miiskor og 15 puntos, samtang si Derrick Favors miamot og 14 puntos alang sa Jazz nga midaog sa labing unang higayon didto sa ilang balwarte sud sa dul-an usa ka bulan.

Mikuha sab og atensiyon si Miles Turner nga mihipos og 18 puntos, 11 ka rebounds ug lima ka blocks sa dihang gitumba sa Indiana Pacers ang Chicago Bulls, 96-90.

Si Darren Collison mikadlit og 23 puntos ug walo ka rebounds, samtang sila si Bojan Bogdanovic ug Treke Evans nagkumboya og 24 puntos sa Pacers.

Sa uban pang mga resulta, sila si Aardon Gordon ug Nikola Vucevic nagkumbinar og 39 puntos 23 ka rebounds sa dihang gipabugnaw sa Orlando Magic ang Miami Heat, 105-90, samtang si Buddy Hield mikamada og 20 puntos sa dihang gilatos sa Sacramento Kings ang Phoenix Suns, 122-105.