Cavs pilde apan miputos og paghigugma ni James
Emmanuel B. Villaruel (Banat) - November 23, 2018 - 12:00am

CEBU, Philippines – Paghigugma ug pagpangga maoy gibati ni LeBron James didto sa yuta niyang natawhan.

Sa labing una niyang pagbiyahe didto sa Cleveland sukad kini niya gibiyaan sa ikaduhang higayon isip usa ka free agent, si James gidawat nga sama sa usa ka bayani ug dayon gipangulohan ang Los Angeles Lakers ngadto sa 109-105 nga kadaogan batok sa Cavaliers nga  inspirado kaayong miduwa, apan wala makapugong sa banggiitan kaayo nilang kanhi teammate.

Si James mitapos uban ang 32 puntos, 14 ka rebounds. Mikadlit siya og 11 puntos nga nakapabangon sa Lakers human ma-alkansi og otso puntos, 99-91 sa katapusang kuwarter dayon na ngadto sa pagpatikyaob sa Cavs.

Duna pa unta'y tsansa ang Cavs nga tablahon ang duwa sa himalatyong oras, apan si Kyle Korver nasipyat sa abli kaayo niyang 3-pointer sa nahibilin nga 17 segundos sa kulbahinam nga aksiyon.

Si Kentavious Caldwell-Pope milansang dayon og upat ka sunod-sunod nga free throws sa final  15 seconds aron silyohan ang makutas nga daog sa Lakers.

Wa'y lalis nga sa tibuok duwa adto masentro ang atensiyon ni James.

Sa higayon nga mitikang siya og balik sa korte didto sa Quicken Loans Arena nga maoy iyang homecourt sud sa 11 ka season, si James giabibahan sa Cavs fans nga sama sa usa ka mibalik nga kampiyon.

Gipasalamatan sa Cleveland si James gumikan sa nahatag niining kaayohan sa ilang dapit, partikular na ang pagpakgang sa 52 ka tuig nilang huwaw sa kampiyonato sa usa ka major sports event ug pagdalit kanila sa labing una nilang korona sa NBA.

Sa nahibilin nga 8:09 sa unang kuwarter, si James gisaludohan sa Cavs pinaagi sa pagpasundayag og usa ka video tribute sa mga mahinungdanon ug emosyonal niyang mga higayon sa dihang nagsul-ot pa siya sa uniporme sa Cavs.

Sukwahi sa una niyang pagbalik human milayas gikan sa poder sa Cleveland aron motapon sa Miami Heat diin siya gisuliyawan, gibalikas ug giyaga-yagaan sa mga fans walo ka tuig na ang milabay, respeto ug pagyukbo maoy gipaambit sa Cavs ngadtong James ning higayona, butang nga seguradong masilsil sa dughan sa four-time MVP sa tibuok niyang kinabuhi. (BANAT NEWS)

JAMES
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with