Pacquiao, Broner mo-promote sa ilang away

CEBU, Philippines — Sila si Pinoy ring star Manny Pacquiao ug kanhi welterweight champion Adrien Broner mopublikar sa mga mahinungdanong detalye sa umaabot nilang away karong Martes didto sa New York.

Sa nahaunang mga balita, si Pacquiao gikatakda nga modepensa sa iyang WBA welterweight title batok ni Broner karong Enero 19 didto sa MGM Grand sa Las Vegas.

Ang 39-anyos nga si Pacquiao dunay 60-7 record uban ang 39KOs, samtang si Broner nagkupot og 33-3 nga baraha uban ang 24KOs.

Sila si Broner ug Pacquiao mag-abot sa usa ka press conference karong Martes didto sa Gotham Hall sa New York ug unya sa Miyerkules didto sa Waldorf Astoria sa Beverly Hills.

Si Pacquiao, ang bugtong eight-division world champion sa kasaysayan sa boksing, mipadayag sa miaging bulan nga 90 porsiyento na siyang segurado nga sangkaon si Broner sa sunod niyang pagkatkat sa ring.

Mao kini ang labing unang away ni Pacquiao sukad siya nakig-alyansa sa gamhanang si Al Haymon nga maoy tigtambag ni Floyd Mayweather Jr.