Sharks mo-host sa heroes
CEBU, Philippines – Manghinaut ang Cebu City Sharks nga makalugnot na usab og dugang kusog sa ilang mga fans sa tinguha nga makabawi sa miagi nilang kaparotan sa dihang ilang sangkaon ang Laguna Heroes sa ikaduha nilang home game sa Maharlika Pilipinas Basketball League (MPBL) Datu Cup karong adlawa diha sa Hoopsdome sa Dakbayan sa Lapu-Lapu.
Mag-abot ang Sharks ug ang Heroes sa alas-9 sa gabii, human sa pasiunang duwa tali sa San Juan Knights ug Imus Bandera nga sugdan sa alas-7 sa gabii.
Ang Sharks mihaw-as gikan sa 62-71 nga kapildihan ngadto sa Knights. Apan sa wala pa kana mahitabo, ang Sharks milangkat og upat ka sagunson nga daog nga nagsugod human ilang gipayaka ang Makati Super Crunch sa labing una nilang home game niadtong Oktubre 6 diha sa University of San Jose-Recoletos (USJ-R) Basak Campus gym.
Mao kadto ang kinatas-an nga ratsada sa Sharks nga klaro kaayong nakaani kanila og respeto sa ilang mga karibal human sa bati nilang performance diin sila nasagunsonan og upat ka pilde ug walo sa kinatibuk-an sa nag-una nilang siyam ka duwa.
Sa pagka karon, ang Sharks nagtangag og 5-9 win-loss record, samtang ang Heroes nagbitbit og 7-7 nga baraha.
- Latest