Warriors mikaging sa Clippers

CEBU, Philippines — Mikolapso ang Los Angeles Clippers  human milabaw og 14 puntos sa ikaupat nga kuwarter, apan salamat ni Lou Williams nga miiskor og 10 sa iyang 25 puntos sa overtime nga maoy nag-agak kanila ngadto sa 121-116 nga kadaogan batok sa Golden State Warriors sa NBA kagahapon didto sa Staples Center sa Los Angeles, California.

Si Montrezl Harrell mitampo og 23 puntos ug si Shai Gilgeous-Alexander miposte og 18 puntos alang sa Clippers nga midaog didto sa ilang korte sa labing unang higayon batok sa Warriors sud sa dul-an upat ka tuig.

Ilang giputol ang pito ka sagunson nilang pilde batok sa Warriors didto sa Staples Center diin sila katapusang midaog niadto pang Disyembre 25, 2014.

Si Kevin Durant mibahog og 33 puntos, 11 ka rebounds ug 10 ka assists alang sa Warriors, apan na-fouled out sa nahibiling 3:36 sa overtime.

Si Klay Thompson miratsada og 31 puntos, apan mipasud lamang og lima sa 16 niya ka 3-pointers sa gabii diin siya miduwa nga wala ang na-injured niyang Splash Brother nga si Stephen Curry.

Mao pa lamang kadto ang ikatulo nga pilde sa Warriors sud sa 14 ka duwa, samtang ang Clippers nagtangag na karon og 8-5 nga baraha.

Didto sa Toronto, Canada, si Anthony Davis mikadlit og 25 puntos uban ang 20 ka rebounds sa dihang giputol sa New Orleans 

Pelicans ang unom ka sagunson nga daog sa  Raptors, 126-110.

Gawas ni Davis, lain pang upat ka starters sa Pelicans ang mibugha og double digits. Si E'Twaun Moore mibahog og 30 puntos, samtang si Jrue Holiday mipupo og 29 puntos ug 14 ka assists aron pahilumon ang langas kaayong Toronto fans didto sa Scotiabank Arena.

Ang Pelicans nagbitbit na karon og 7-6 record, samtang ang Raptors nakatilaw sa ikaduha nilang pilde nga giatbangan og 12 ka daog.

Sila si Kawhi Leonard ug Pascal Siakam nagkumboya'g 42 puntos alang sa Raptors, apan si Kyle Lowry naangklahan ngadto lamang sa kuwatro puntos sud sa 33 minutos niining pagbabad sa korte.

Sa laing aksiyon, giselebrar sa Philadelphia 76ers ang pag-abot ni Jimmy Butler sa ilang poder pinaagi sa 124-114 nga kadaogan batok sa Miami Heat.

Si Butler nga nabira sa 76ers gikan sa Minnesota Timberwolves, moduwa sa bag-o niyang koponan sa Huwebes pa moduwa batok sa Orlando Magic.

Apan bisan og wala pa si Butler, mangtas gihapon kaayo ang Sixers ubos sa pagpangu ni Joel Embiid nga mipabuhagay og 35 puntos ug 18 ka rebounds. Nanginit sab sila J.J. Redick ug Ben Simmons nga nagkumbinar og 38 puntos.