CEPCA-A naghari sa boy Pestaño Memorial Chessfest

CEBU, Philippines — Ang Cebu Executives and Professionals Chess Association (CEPCA) Team A mipukan sa Gullan Trading & Construction sa ikasiyam ug katapusang hugna, 2-1 ug igo na kini alang kanila aron sakmiton ang kampiyonato sa 2nd Boy "Chessmoso" Pestaño Memorial Chess Team Tournament niadtong Domingo diha sa Barracks Chess Club sa Robinsons Galleria Cebu.

Gitimonan nilang National Master Arnolito Cadiz, Rogelio Enriquez Jr. ug  Jong Melendez, ang CECPA-A mitapos sa duha ka adlaw nga torneyo nga midugang og lamas sa ika-28 nga anibersaryo sa CEPCA bitbit ang labing taas nga 8.0 puntos. Ilang nadaog ang P25,000 nga ganting salapi.

Ang Team KKK nilang Jethro Esplanada, Jefte Crebillo ug Robert John Padel; ang Aim Coop nilang Jaime Joshua Frias, Wilhelm Joey Ardiente ug Leo Cortes ug ang Toledo City nilang Bonn Rainauld Tibod, Christopher Tubalado ug Carlos Trocio parehong mitali og 7.0 puntos, apan ang Team KKK maoy mipahiluna sa ikaduhang dapit nga nagtangag og P15,000 nga ganti gumikan sa mas taas niining tie-breaker.

Nalandig sa ikatulong puwesto ang Aim Coop ug ang Toledo City maoy ikaupat.

Ang Danao City Chess Club nilang Bryle Arellano, Norman Longjas ug Eric Abanco nagsolo sa ikalimang puwesto uban ang 6.5 puntos.

Naglangkob sa top 10 mao ang CEPCA B nilang Ramsey Pedroza, Neal Amores ug Candido Lepiten; Team San Fernando nilang Venancio Loyola Jr, Joselito Loquez ug Robert Quiros; Team Star Wars nilang Carlos Moreno III, Joel Pacuribot ug Dennis Navales; RJK team nilang Rommel Ganzon, Kidd Salazar ug Justine Flint Misa  ug BEST nilang Richard Natividad, Rosendo Yamyamin ug Martin Sean Kwan. (BANAT NEWS)