Baby Lancers batok Jr. Webmasters sa finals
CEBU, Philippines — Gitagak sa defending champion University of the Visayas (UV) Baby Lancers ug University of Cebu (UC) Junior Webmasters ang tagsa-tagsa nila ka mga kaatbang aron pag-angkon og katungod nga maoy mag-abot sa juniors division finals sa 18th Cebu Schools Athletic Foundation, Inc. (CESAFI) men's basketball tournament kagahapon diha sa Cebu Coliseum.
Si Gabriel Cometa mipabuhagay og 24 puntos uban ang unom ka assists, lima ka rebounds ug tulo ka steals sa dihang gilat-an sa Baby Lancers ang University of Southern Philippines Foundation (USPF) Baby Panthers, 89-65.
Miamot si Beirn Anthony Laurente og 20 puntos, lima ka rebounds ug tulo ka assists, samtang si Joshua Yerro mitali og 12 puntos ug 12 sab ka rebounds sa Baby Lancers nga wala na molingi pa sukad gitak-op nila ang first half sa iskor nga 41-24.
Sangkaon sunod sa Baby Lancers ang Junior Webmasters nga mi-abante sab sa kampiyonato human gipabakwit ang University of San Jose-Recoletos (USJ-R) Baby Jaguars, 76-62.
Dominado kaayo ang duwa sa Junior Webmasters nga sa usa ka higayon naglabaw og 22 puntos, 74-42 sa nahibilin nga 4:05 sa aksiyon.
Si Isaiah Blanco, anak ni kanhi PBA star Dondon Hontiveros maoy nangu sa Junior Webmasters uban ang 13 puntos ug unom ka rebounds, si Jerick Ranido dunay 12 puntos, samtang sila Jasper Pacana ug Joshua Gellacone mitampo og 11 puntos matag usa.
Sugdan sa Baby Lancers ug Junior Webmasters ang ilang 'best-of-three' finals karong Oktubre 24.
- Latest