CEPCA anniversary chessfest sugdan karon

CEBU, Philippines – Kapin sa 100 ka magduduwa og ahedres nga gibahig sa dili momenos 30 ka teams ang magtakus sa ilang abilidad gumikan kay ang  2nd Boy 'Chessmoso' Pestaño Memorial Open Chess Team Tournament sugdan na karong adlawa diha sa  Barracks Chess Club sa Robinsons Galleria Cebu.

Ang duha ka adlaw nga torneyo gituyo aron pagdugang og lamas sa ika-28 nga anibersaryo sa Cebu Executives and Professionals Chess Association (CEPCA).

Sa dili pa sugdan ang aksiyon, usa ka simpleng seremonyas sa pagbukas ang ipahigayon sa ala-1 sa hapon diin si  Cebu City Councilor Sinsinio Andales nga usa sa mga founding members sa CEPCA maoy dinapit.

Giubanan siya sa mga opisyales sa CEPCA nga gipangulohan sa ilang presidente nga si Engr. Jerry Maratas.

Dul-an sa P75,000 nga ganting salapi ang iapud-apod ngadto sa mga mananaog.

Ang makampiyon mokabi og P25,000, samtang ang mopahiluna gikan sa ikaduha ngadto sa ikalima modawat og P15,000, P10,000, P5,000 ug P3,000, matag usa. Ang 6th ngadto sa 10th hatagan og P2,500 matag usa.

Ang National Chess Federation of the Philippines (NCFP)-sanctioned event gipaluyohan sa Jemar Engineering Services, Celjem Construction and Development Corporation, Handuraw, Salon de Rose ug Hale Manna.