NBA sugdan na

MANILA, Philippines – Midaghan man tuod ang dekalibre nilang mga kontra, apan nagpabiling paborito ug inilog ang Golden State Warriors sa ika-73 nga NBA season nga magsugod na karong adlawa.

  Sa ilang pag-host sa Oklahoma City Thunder didto sa Oracle Arena sa Oakland, California, seguradong inspirado nga moduwa ang Warriors gumikan kay sa dili pa ang aksiyon ipahigayon man ang tradisyonal nga pag-isa sa ilang championship banner agi'g  pagsaludo sa ilang paglangkat sa titulo sa miaging season.

Mismo si NBA commissioner Adam Silver ang motambong sa emosyonal nga seremonyas aron sab paghatag sa ikatulong championship rings sa Warriors nga maoy nanghawod sa liga tulo ka higayon sa miaging upat ka tuig.

Sa ilang pagsuway og angkon sa ikatulo nilang sagunson nga korona, ang Warriors mobangga og daghan kaayong lig-on nga mga pader. 

Apil na niini ang Los Angeles Lakers nga moparada ni LeBron James ug ang Houston Rockets nga misamot kalig-on sa paghiabot ni Carmelo Anthony nga ikatumpang unya nilang James Harden ug Chris Paul. 

Bisan og wala na si James, dili gihapon basta-basta ang Cleveland Cavaliers, samtang anaa sab nagpahipi ang Philadelphia Sixers.

Apan gitimbre nga magtige sa trono sa Eastern Conference mao ang Boston Celtics ug ang Toronto Raptors. Misamot kamangtas ang Celtics sa pagbalik nilang Gordon Hayward ug Kyrie Irving, samtang ang Raptors nawad-an man tuod ni DeMar DeRozan apan daw milig-on hinuon  gumikan sa presensiya ni Kawhi Leonard.

Apan taliwala niining tanan, adto gihapon punting ang atensiyon sa Warriors nga gipanglantawan nga mobira sa ikatulo nilang sunod-sunod nga kampiyonato ug ikaupat sa kinatibuk-an sa miaging lima ka tuig.

Ubos sa pagtimon sa ilang "Fantastic Four" nga sila si Kevin Durant, Stephen Curry, Klay Thompson ug Draymond Green, mas mihait pa ang Warriors gumikan sa ilang pagkuha ni DeMarcus Cousins.

Kay anaa kanila ang tanan nga atensiyon, si Warriors coach Steve Kerr nagkanayon nga dili kini mahimong rason nga sila mapresyur ilabi na kay kun bisan unsa pa'y ilang madangatan, segurado na man ang ilang luna sa kasaysayan.