Caburnay, Sorongon midominar sa Milo Marathon Cebu leg
Emmanuel B. Villaruel (Banat) - October 15, 2018 - 12:00am

Taga-Mindanao nangharos

CEBU, Philippines — Ang tadhan nga mga managanay gikan sa Mindanao nga sila si Keenan Lou James Caburnay ug Ruffa Sorongon maoy milugwa nga labing sanag sa dul-an 20,000 ka mga entrante human gidominar ang tagsa-tagsa nila ka mga dibisyon sa Cebu elimination sa 42nd National Milo Marathon nga nagsugod sa Cebu Normal University (CNU) ug nahuman sa Cebu City Sports Center kagahapong adlawa.

Si Caburnay, lumad gikan sa Malaybalay City, Bukidnon, maoy labing paspas sa tanan human gitapos ang makutas nga karera sud lamang sa usa ka oras, 13 minutos ug 34 segundos aron paglangkat sa men's 21K title.

Iyang gibiyaan si Joseph Arnel Emia nga maoy nalandig sa ikaduhang dapit sa oras nga 1:14:59, samtang si Agustin Ychon Jr., nga kauban ni Caburnay ubos sa Spectrum Runners, mipahiluna sa ikatulong puwesto sa oras nga 1:15:28.

“Na-surprise ko sa rota kay taas gyud ang uphill but overall okay ang experience. Though I was not able to hit my target time, I'm still happy because achieve my goal that  is to win,” matud pa ni Caburnay nga gradwado sa kursong acounting gikan sa San Isidro College didto sa ilang dapit.

Ang anak og sidewalk vendor ug security guard nagdamgo nga ugma damlag iyang mabuak ang Southeast Asian (SEA) Games record.

Wala sab magpa-alkansi si Sorongon nga mao kanunay ang naglabaw gikan sa pagsugod sa lumba aron sakmiton ang korona sa women's 21K sud sa usa ka oras, 30 minutos, ug 18 segundos.

Si Kay Razel Cundangan maoy mipatong sa ikaduhang dapit sa oras nga 1:52:15 ug gisundan kini ni Lucita Fernandez sa oras nga 1:52:25.

“I am happy. I always get the same feeling of happiness whenever I succeed," dason pa sa 28-anyos nga si Sorongon nga way lalis nakahimo na og impresibong marka nunot sa iyang pagdominar sa mga dagkong lumba dinhi sa Sugbu.

Gawas nga mibulsa og ganting salapi, sila si Caburnay ug Sorongon nakaangkon sab og luna sa National Finals nga gikalendaryo karong Disyembre 9 didto sa Laoag City, Ilocos Norte.

Nilang duha, si Sorongon maoy magpas-an sa labing bug-at nga hagit gumikan kay sangkaon niya mao man ang Sugbuanang Olympic marathoner nga si Mary Joy Tabal sa Nationals.

Si Tabal, ang giyukboan nga rayna sa Milo Marathon, naglaraw nga palapdan pa ang iyang record pinaagi sa pagdaog sa ikaunom niyang sagunson nga kampiyonato.

Sa laing bahin, si Milo Marathon Cebu leg organizer Ricky Ballesteros mihulagway nga malampuson ang ilang kalihukan bisan pa man sa mga gagmayng kakulian nga ilang nabagatan ilabi na niadtong babayeng runner nga si Hazel Conde nga nabanggaan og hubog nga drayber.

“It’s another good and successful hosting despite atong nabanggaan. More importantly, okay ra man ang runner (Hazel Conde) na nabanggaan. I personally checked her at the hospital and makalihok raman siya. Naa puy usa nga ni-collapse, okay naman pud siya. Nahutdan lang siguro to'g hangin. But overall, all had fun and we look forward to the national finals,” asoy pa ni Ballesteros.

Sa iyang bahin, si Milo Sports Executive Lester Castillo gibati sab og tumang kalipay nga gidagsa na sab ang tinuig nilang aktibidad dinhi sa Sugbu nga mihakot na sab sa labing daghan nga entrante nga miabot ngadto sa 19,250.

“We are very happy with the turnout. We have the biggest number of runners here so far with 19, 250 and we have seen how the running clubs have progressed, from the short distances to more participants joining in the 10K and 21 kilometers. Pati nga yung sa cheerdance, nag-improve din yung mga routines nila,” batbat pa ni Castillo. (BANAT NEWS)

NATIONAL MILO MARATHON
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with