Pulpogan, Garing, Polog nimartsa sa 8th mayor Alegado Cup finals

CEBU, Philippines — Ang  Pulpogan, Garing ug Polog miabante na sa finals sa tagsatagsa nila ka  dibisyon  sa 8th Mayor Teresa 'Nene' P. Alegado Fiesta Basketball League didto sa Consolacion.

Sa Inter-Barangay Seniors Category A, ang defending champion Pulpogan mipaduol ngadto sa usa na lang ka duwa aron hingpit nga mapanalipdan ang ilang trono human gitagak ang Poblacion Oriental, 89-75.

Ang managsuong Russel ug Rexon Moneva nagkumbinar og 51 puntos, samtang ang duha ka kanhi sakop sa University of the Visayas (UV) Lancers  nga silang Chris Yonnel Perolino ug JC Escalona nagkumboya'g 25 puntos alang sa Pulpogan nga milusad og 30-15 rally sa ikaduhang kuwarter aron moabante og 14 puntos sa halftime sa iskor nga 68-54.

Ang mga Malagar nga sila si Larry, Lemuel ug Louie mikolekta og tinigum nga 49 puntos, apan nakawang ang ilang paningkamot kay natagak na man ang Poblacion Oriental.

Sa laing bahin, si Clyde Alin mipupo og 22 puntos, si Von Xyle Tundag mitali og 17 ug si Edimz Pongase midugang og 15 sa dihang ang Garing mipabakwit sa Panas, 82-61 aron pag-angkon og katungod nga maoy makigharong sa Tolotolo sa kampiyonato sa SK Juniors Category B.

Sa Midgets Category B, sila si Kim Shannon Capangpangan, Johncel Tuñacao ug Ben Carlo Alin nagkumboya'g 34 puntos sa dihang gipalayas sa Polog ang Tolotolo, 70-65 aron pag-abante sa finals diin ilang sangkaon ang Garing.

Sa bugno alang sa ikatulong dapit sa Midgets Category A, si Rovello Robles mipatuasik og 35 puntos, samtang sila si Raymundo Ageas ug Prince Soquiño dunay 12 puntos matag usa alang sa Polpogan nga mipukan sa Pitogo, 89-82.

Sa SK Juniors Category A, sila si John Lloyd Pepito ug Marco Booker Panta mihipos og 31 puntos sa Pitogo  nga mipilde sa twice-to-beat nga Casili, 69-66 aron pagpuwersa og tagakay nga duwa.