Blatche nadisgrasya

CEBU, Philippines — Nanghinaut ang mga kadagkoan sa Samahang Basketbol ng Pilipinas (SBP) nga luwas unta ang kahimtang ni naturalized center Andray Blatche nga gikataho  nakasugat og disgrasya sa kadalanan didto sa Estados Unidos niadtong Lunes.

Si Blatche mi-post og hulagway sa iyang instagram account diin gipakita ang nalumping niya nga sakyanan agi sa panagbangga niini sa laing sakyanan sa wala pa madasok sa kilid sa dalan.

Wala hinuon mihatag og detalye si Blatche sa iyang kahimtang hinungdan nga  gikontak siya ni SBP official Butch Antonio, apan hangtod karon wala pa'y tubag.

"Yes I saw (his post), pero wala pa siya reply," matud pa ni Antonio sa Spin.ph.

Ang 6-foot-8 nga si Blatche niuli una sa Estados Unidos samtang nagserbisyo siya sa iyang suspensiyon gikan sa FIBA human nalambigit sa nahitabong rambol sa Gilas ug Australia niadtong Hulyo didto sa Philippine Arena.

Si Blatche mahimo na hinuon nga makabalik og duwa sa Pebrero sa katapusang  leg  sa   2019 FIBA  World  Cup qualifiers.