Clarkson dunay chance mosidlak sa Cleveland

CEBU, Philippines — Usa si Fil-American Jordan Clarkson ang nakita nga makabenepisyo sa pagbiya ni LeBron James sa Cleveland Cavaliers tungod kay  dako siya og kahigayonan nga makapakita sa iyang abilidad sa maong koponan.

Si Clarkson miabot sa hinapos na nga bahin sa season sa Cavs human gi-trade gikan sa Los Angeles Lakers, apan wala kaayo kini magamit ilabi na sa playoffs ug finals diin napilde ang Cavs sa Golden State Warriors.

Ning higayona, si Cavs coach Tyronn Lue miingon nga salig siya nga makasulod gihapon sa playoffs ang Cavs bisan og wala pa ang giilang labing dominanteng player nga si James nga atua na sa Lakers.

Si Lue miingon nga higayon na sa Cavs nga mobaid sa mga batan-on nilang player  nga naglakip ni Clarkson.

"That's our goal and that's what we want to do. We want to win and continue to get better, and develop our younger players while winning games," matud pa niya sa Associated Press.

Gawas sa mga batan-ong players, ang Cavs aduna gihapo'y   masaligan nga mga veteran  sama ni  All-Star Kevin Love, JR Smith ug Kyle Korver.