Austria dismaya sa lain nilang kapildihan sa Ginebra
CEBU, Philippines — Wala nangasaba, apan wala tinggi ni San Miguel Beermen coach Leo Austria ang iyang mga players human sa ilang 102-110 nga kapildihan batok sa igsuon nilang koponan Barangay Ginebra Kings niadtong Domingo.
Timaan nga nasuko si Austria human sa ilang kaparotan mao ang pagwala niya pagtambong sa post-game press conference diin mibalibad siya pag-atubang sa mga sports media.
Nagtuo gyud si Austria nga makabawos na sila sa Ginebra gikan sa ilang sakit nga kapildihan sa PBA Commissioner's Cup finals, apan wala kini mahitabo.
Gawas nga napilde, makauuwaw alang ni Austria ang maong kapildihan tungod kay ang Ginebra miduwa nga aduna lamang 10 ka players tungod sa injuries sa mga key players niini nga naglakip nila ni Cebuano center Greg Slaughter, Joe Devance, Japeth Aguilar ug Sol Mercado.
Bisan pa og wala ilang star player nga si JuneMar Fajardo, ang San Miguel gipaboran gihapon nga modaog, apan wala damha nga ang second stringer nga si Aljun Mariano sa Ginebra mao ang miguba sa ilang depensa. (BANAT NEWS)
- Latest