Cebu City Sharks padayong misaliring
CEBU, Philippines — Padayon nga misaliring ang Cebu City Sharks human kini mabuntog sa Bataan Risers, 69-76 sa 2018 Maharlika Pilipinas Basketball League (MPBL) Datu Anta Cup niadtong Sabado sa gabii didto sa Ynares Sports Arena sa dakbayan sa Pasig.
Samtang ang Risers misulbong ngadto sa solong liderato bitbit ang 8-1 nga baraha, ang Sharks padayong nagtingkagol sa kinailawmang dapit kay usa pa ang daog sa siyam ka duwa nga maoy labing bati nga rekord sa liga.
Nindot unta ang gipakitang salida sa Sharks nga nakalabaw pa gani og 10 puntos sa first half. Apan kalit lang silang misaliring dihang gipabuthan sa Risers og 23-12 nga bomba sa ikatulong kuwarter.
Katapusang nakasikit ang Sharks sa iskor nga 64-67 gumikan kay sila si Byron Villarias ug Jonathan Raymundo miduslit og lima ka sagunson nga puntos aron pagpaginhawa og lawom sa Risers nga milabaw og otso puntos sa iskor nga 72-64 sa nahibilin nga 2:09 sa duwa.
Si Raymundo maoy nangu sa Bataan uban ang 12 puntos, upat ka rebounds ug upat sab ka assists, samtang si Villarias mikadlit og 10
puntos ug 11 ka rebounds.
Si Patrick Cabahug mihipos og 25 puntos ug milangkat og 11 ka rebounds sa misarasay nga Sharks. (BANAT NEWS)
- Latest
