Raptors nagtinguha pagkuha ni Butler
CEBU, Philippines — Maningkamot ang Toronto Raptors nga makuha nila ang serbisyo ni Jimmy Butler gikan sa Minnesota Timberwolves pinaagi sa trade aron makaporma sila og kaugalingon nilang "super team" sa umaabot nga season sa National Basketball Association nga sugdan sunod bulan.
Si Butler mihimo og kasikas sa miaging semana human siya mipadayag sa iyang tinguha nga mobiya sa Timberwolves tungod kay wala na siya kauyon sa koponan.
Ang All-Star swingman aduna pa'y kontrata sa Minnesota, apan ang kadagkoan sa Timberwolves mipakita og pag-uyon nga i-trade siya sa ubang koponan. Ang Raptors nagtuo nga mahimo silang premyadong contender sa Eastern Conference kun makuha nila si Butler nga maoy ikatulo nilang star uban nila ni Kyle Lowry ug Kawhi Leonard nga nakuha sab nila gikan sa San Antonio Spurs pinaagi sa trade bugti ni DeMar DeRozan.
"If Toronto can get Butler, the team will form a new big three with Lowry and Kawhi," matud pa sa NBA analyst nga si Adrian Wojnarowski.
Gawas sa Raptors, lain nga mga koponan nga gusto mobira ni Butler naglakip sa Houston Rockets, Philadelphia 76ers, Los Angeles Clippers, Cleveland Cavaliers, Brooklyn Nets, Detroit Pistons, Portland TrailBlazers ug ang Sacramento Kings. (BANAT NEWS)
- Latest
