Lancers, Panthers mag-ilogsolo 3rd
CEBU, Philippines — Naglaraw ang two-time defending champion University of the Visayas (UV) Green Lancers ug University of Southern Philippines Foundation (USPF) Panthers nga magbinugtong sa ikatulong dapit sa liderato sa ilang panag-abot karong adlawa sa 18th Cebu Schools Athletic Foundation, Inc. (CESAFI) men's basketball tournament diha sa Cebu Coliseum.
Sa ilang engkuwentro sa alas-6:30 sa gabii, ang Lancers duna pa'y laing tuyo ug kini mao ang pagpanimalos sa Panthers nga mipukan kanila sa labing sikit nga desisyon, 81-80 sa miagi nilang sangka niadtong Agosto 30.
Human gisira ang unang hugna sa eliminasyon bitbit ang 3-3 record, ang Lancers nakasagunson og duha ka daog, samtang ang Panthers nakabalon og 61-64 nga kaparotan sa kamot sa Southwestern University (SWU)-Phinma Cobras niadtong Domingo.
Mao kini ang naghatod sa duha ka habig nga magtabla sa ikatulong puwesto sa collegiate division standings sa managsama nilang 5-3 win-loss records.
Sa pasiunang duwa nga gikatakda sa alas- 5:15 sa hapon, ang University of San Carlos (USC) Warriors gipaabot nga mosanta sa tulo ka duwa nilang pagkadakin-as sa dihang ilang harungon ang nagkagidlay nga Cebu Institute of Technology-University (CIT-U) Wildcats.
Ang Warriors nahimutang karon sa ikalimang puwesto bitbit ang 2-5 nga baraha, samtang ang Wildcats nangiwit gihapon nga wala pa'y daog sa pito ka duwa. (BANAT NEWS)
- Latest