MMA World champs sa nasud napun-an
CEBU, Philippines — Nakaangkon sa ikaupat nga mixed martial arts world champion ang nasud human milampos si Joshua Pacio paglabni sa ONE Championship strawweight title gikan sa Hapon nga si Yoshitaka Naito atol sa ilang sangka niadtong miaging gabii didto sa Jakarta, Indonesia.
Si Pacio kinsa gitan-aw nga usa ka underdog batok sa mas beteranong si Naito, isug nga miatake ug migamit sa iyang agresibo nga istilo aron lupigon ang Hapon. Human sa lima ka rounds nga sangka, ang mga hurado nagkahiusa ug mihatag ni Pacio sa unanimous decision nga kadaugan.
Si Pacio mao karon ang ikaupat nga Pinoy MMA world champion uban sa iyang mga teammates sa Team Lakay nga sila si Geje Eustaquio, Kevin Belingo ug Fil-American heavyweight Brandon Vera.
Si Pacio mipahinungod sa iyang daog ngadto sa mga taga-Benguet nga grabeng naapektohan sa miaging bagyong Ompong niadtong miaging semana.
“It’s an unexplainable feeling. Last week, we had a typhoon that struck Itogon, Benguet. Some people are missing, some are dead, and they’re still looking for the missing. This fight is for all of them,” matud pa ni Pacio sa The Philippine STAR. (BANAT NEWS)
- Latest
