GCM's 25th Anniversary Run gitakda sa Oktubre 28
CEBU, Philippines – Ang mga mahiligon sa lumba adunay kahigayonan nga makahatag og pinuy-anan sa giabandonar nga mga bata ug tiguwang sa ipahigayong Gaisano CountryMall 25th Anniversary Run karong Oktubre 28 nga manukad ug matapos sa hawanan sa maong mall sa Barangay Banilad, Dakbayan sa Sugbo.
"This is an answered prayer, this will be beneficial to our brothers and sisters who are in need," matud pa ni Murray Laurent Goodman sa Missionaries of the Poor, usa ka religious community nga motabang sa mga kabus ug sa mga adunay panginahanglan.
Adunay pito ka kategoriya nga mahimong pilian nga daganan sa mga entrante ning tinuig nga lumba ug kini mao 5K, 10K, 15K, 21K ug ang bag-ong 6K Extra Challenge.
Ang mga partisipante sa 6K Extra Challenge moagi pa og usa ka multiple military obstacles sa dili pa mopaingon sa finish line.
Dili momenos 3,000 partisipante ang gilauman sa organizers nga mosalmot sa maong lumba.
Moabot ngadto sa P100,000 ganti ang gitagana sa tanang mananaog sa matag dibisyon, samtang ang 21K finishers makadawat og specially-designed medal.
Ang registration fee nagkantidad og P400 sa 5K, P500 sa 10K, P600 sa 15K, P700 sa 21K ug P800 sa 6K Challenge.
Niadtong gusto nga mosalmot, mahimong magparehistro sa customer service booth sa Gaisano CountryMall, Gaisano Main Colon ug RUNNR sa Ayala Center Cebu.
- Latest
