7-0 tirada sa UC

CEBU, Philippines – Ang haring gangis nga University of Cebu (UC) Webmasters ug two-time defending champion University of the Visayas (UV) Green Lancers makigharong sa tagsa-tagsa nila ka mga kontra nga managlahi ang tuyo sa 18th Cebu Schools Athletic Foundation, Inc. (CESAFI) men's basketball tournament diha sa Cebu Coliseum karong adlawa.

Suwayan sa Webmasters nga panalipdan ang walay pilde nilang rekord sa dihang ilang sugdan ang ilang kampanya sa ikaduhang hugna batok sa University of San Carlos (USC) Warriors karong alas-4 sa hapon, samtang ang Lancers nagpangagot nga makabawos sa University of San Jose-Recoletos (USJ-R) Jaguars sa ilang engkuwentro sa alas 5:30 sa hapon.

Bitbit ang 6-0 nga baraha, ang Webmasters ni coach Yayoy Alcoseba gipanglantawan nga mousab og pukan sa Warriors, nga nahimutang sa ikalimang dapit sa standing bitbit ang 2-4 win-loss card.

Samtang ang Lancers nga lab-as pang mihaw-as gikan sa 70-51 nga demolisyon sa  Southwestern University (SWU) Phinma Cobras,  naglaraw nga moresbak sa Jaguars nga maoy mipatilaw kanila sa labing una nilang pilde karon nga season.

Sa kasamtangan, ang Lancers anaa sa ikatulo sa standing uban ang 4-2 records, samtang ang Jaguars nagbarog sa ikaduha kay usa pa'y pilde sa unom ka duwa.

Sa mga duwa sa juniors division, ang defending champion UV Baby Lancers  laraw nga moinat sa init nilang ratsada ngadto sa 4-0 sa ilang paghamag sa Cebu Eastern College (CEC) Dragons sa ala-1 sa hapon, samtang ang Sacred Heart School-Ateneo de Cebu (SHS-AdC) Magis Eagles nagtinguha nga makasagunson og duha ka daog sa ilang pakigtige sa Baby Cobras sa alas-2:30 sa hapon.