Polog, Tolo-Tolo, Garing abante sa division finals sa Alegado Cup
CEBU, Philippines – Ang Polog, Tolo-Tolo ug Garing mitikang ngadto sa kampiyonato sa tagsa-tagsa nila ka dibisyon bitbit ang 'twice-to-beat' incentives sa 8th Mayor Teresa 'Nene' P. Alegado Fiesta Basketball League didto sa Consolacion.
Ang defending champion Polog mipahayag sa ilang kampanya nga mapanalipdan ang ilang trono sa Inter-Barangay Seniors Category B human gitagak ang Lanipga, 67-41.
Si Joseph Bill Pepito mitimbre og 18 puntos, samtang sila si Tomas Martel ug Franny Sucon nagkumbinar og 23 puntos alang sa Polog nga wala na mahulga pa sukad miposte og 34-17 nga bentaha sa halftime.
Sa SK Juniors Category B, ang Tolo-Tolo miabante sa finals human nakaipsot batok sa Garing, 63-60.
Sila si Jaypee Jay Ponce ug Quijano maoy nangu sa Tolo-Tolo nga nagkumbinar og 27 puntos, samtang si Jay Harold Herbito miamot og 12 ug si Jessie Bathan midonar og 10 puntos.
Wala sab magpaalkansi sila si Von Charles Alin, Estephen Alivio ug Jan Manaseh Ouano nga nagkumboya og 33 puntos sa dihang gibuntog sa Garing ang Tolo-Tolo, 59-51 aron moabante sa finals sa Midgets
Category B.
Nagpabilin sab nga buhi ang Garing sa Inter-Barangay Seniors Category B human gilubong ang Tolo-
Tolo, 69-51 sa ilang tagakay nga duwa.
Si Carl John Ylaya maoy nangu sa Garing uban ang 16 puntos, gisundan nilang Jonel Marayan ug Junrey Alimoren nga mirehistro og 14 ug 12 puntos.
Sa laing mga aksiyon, ang Casili ug Nangka milayat ngadto sa Inter-Barangay Seniors Category A semifinals.
Si Warren Cadampog mibahog og 24 puntos ug si Dwight Gonzaga miamot og 23 sa dihang gipasibat sa Casili ang Danglag, 87-82, samtang si Benson Colango mikadlit og 22 puntos ug sila si Romar Ponce ug Philip Niño Garcia mikolekta og 25 puntos sa dihang gipalagpot sa Nangka ang Pitogo, 92-74.
Sa Midgets Category A, si Denmark Condiman mipabuto og 29 puntos ug si Justin Maglasang miiskor og 24 sa dihang ang Pitogo mipanso og luna sa semis human makaeskapo bitbit ang 94-93 nga kadaogan batok sa Jugan.
- Latest
