Alvarez, Golovkin pulos nangahas og 'knockout'
CEBU, Philippines — Misangpot na sa personal ang dumot nila ni middleweight king Gennady Golovkin ug Saul 'Canelo' Alvarez nga pulos nangahas moiskor og 'knockout' nga kadaogan sa ilang 'rematch' ugma didto sa T-Mobile Arena sa Las Vegas.
Unang nagsangka ang duha sa miaging tuig apan miresulta ngadto sa 'controversial draw'. Ning higayona, sila si Golovkin ug Alvarez mibahad nga buhaton nila ang tanan aron modaog pinaagi sa 'knockout'.
"I'm going to go in there to knock him out," matud pa sa Mexican nga si Alvarez sa Associated Press. "Every night before bed I visualize what I'm going to do, which is to get a knockout."
"It's a little bit different. It's a real fight, a real war," matud pa usab ni Golovkin.
Ang duha ka banggiitang boksidor gikatakda unta nga mag-'rematch' niadtong Mayo 5, apan nakanselar kini human si Alvarez duha ka higayon nagpositibo sa 'clenbuterol', usa ka matang sa ginadili nga droga nga misangpot sa unom ka buwan nga suspensiyon.
Si Alvarez miinsister nga ang duha ka napakyas niyang drug test naggumikan sa pagkaon niya og kontaminadong karne.
Apan si Golovkin wala motuo sa rason ni Alvarez nga nakakaon siya og karne nga kontaminado ug ang paggamit niya sa ilegal nga drugas maoy hinungdan nga mipositibo kini sa drug test.
Nagtuo si Golovkin nga misuway gyud og panikas si Alvarez aron makabentaha, apan walay suwerte kay nasakpan.
- Latest