Golovkin mipainit sa ulo ni Alvarez

CEBU, Philippines – Si Gennady Golovkin milusad og balik sa  init niyang tirada ngadto ni Saul 'Canelo' Alvarez pinaagi sa pag-akusar sa Mehikano niyang karibal nga usa ka 'tikasan'.

Ang wa'y pildeng hari sa middleweight division nga si Golovkin mokatkat ibabaw sa ring aron makigbinukbukay og usab ni Alvarez didto sa T-Mobile Arena sa Las Vegas karong Domingo, usa ka tuig human ang una  nilang engkuwentro miresulta ngadto sa 'controversial draw'.

Gikatakda unta nga mag-'rematch' ang duha ka banggiitang boksidor niadtong Mayo 5, apan nakanselar kini human si Alvarez duha ka higayon nagpositibo sa 'clenbuterol', usa ka ginadili nga matang sa droga nga misangpot ngadto sa unom ka buwan nga suspensiyon.

Si Alvarez miinsister nga ang duha ka napakyas niyang drug test naggumikan sa pagkaon niya og kontaminadong karne ug  maglagot siya kun pasanginlan siya nga tigamitan  og ginadili nga matang sa droga sa iyang karera. Apan, si Golovkin dayag nga misalikway sa rason ni Alvarez kay alang kaniya usa ka tikasan ang Mehikanong kampiyon. Si Golovkin nagkanayon nga dili malilong ni Alvarez ang kamatuoran gumikan kay dunay makitang mga marka sa injection sa mga kamot, braso ug uban pang bahin sa kalawasan niini.

Giangkon ni Golovkin nga bisan og nakontrobersiyal ang una nilang sangka, maayo gihapon ilang relasyon, apan nagusbat kini human nagpositibo si Alvarez sa drug test.