10,000 BC, Joeric, RWS nangharos sa PSC monthly boxing

CEBU, Philippines — Misidlak og maayo ang mga pambato sa 10,000 BC, Joeric Boxing Club ug RWS Stable sa pagpadayon sa aksiyon sa Philippine Sports Commission (PSC)-Visayas Monthly Amateur Boxing niadtong weekend diha sa Cebu City Sports Center.

Sila si David Mancao, Jay Bryan Baricuatro ug Wyn Cabradilla sa 10,000 BC maoy nanghawod sa labing ubos nga mga timbang ning binulan nga torneyo nga gipasiugdahan ni Amateur Boxing Alliances of the Philippines (ABAP) Central Visayas head ug PSC-7 in-charge of boxing development Lorenzo 'Chao' Sy isip kabahin sa iyang grassroots program alang sa mga Sugboanong boksidor.

Sila si Mancao ug Baricuatro parehong midaog pinaagi sa 'unanimous decision' batok nilang Prence Espina sa Joeric Boxing Club ug Jance Jezreel Quilaton sa Team Cebu City sa 25 kgs. ug 30 kgs. category, samtang si Cabradilla midaog pinaagi sa 'split decision' batok ni Keyl Sumalinog sa SEVA sa ilang bugno ubos sa 31 kgs. 

Wala sab magpaulahi  ang mga sakop sa RWS Stable sa notadong Sugboanong promoter nga si Rex 

'Wakee' Salud nga mikadlit sab og tulo ka daog kortesiya nilang Daryl Balderas, Manolito Egdamen ug Alexis Jabonero.

Si Balderas mipilde ni Arniel Fajardo sa 10,000 BC sa ilang paperweight (40 kgs.) match, si Egdamen mipaundang ni Denviel Patillano sa Team Cebu City sa oras nga 1:14 sa ikaduhang hugna sa ilang flyweight (50 kgs.) nga sangka, samtang si Jabonero mibuntog ni Cirizalde Dacumos sa Team Cebu City pinaagi sa 'split decision' sa laing aksiyon sa 50 kgs.

Ang mga batos sa Joeric Boxing Club nga sila si Sean Abello ug Kenneth Espina nagparamdam sab sa ilang presensiya pinaagi sa pagposte sa labing impresibo nga mga kadaogan. 

Si Abello nanginahanglan lamang og 70 segundos aron idispatsar si Nathaniel Alfornon sa 10,000 BC sa ilang 35 kgs. match, samtang gipaundang ni Espina si Justine Equilla sa RWS Stable sa oras nga 1:46 sa unang hugna sa ilang engkuwentro ubos sa 44 kgs.

Ang ilang teammate nga si John Paul Dignos miiskor sab og daog pinaagi sa 'split decision' batok sa Yeroge Gura sa RWS Stable sa laing 50 kgs. match-up.