Pilipinas napilde gyud sa China sa Asian Games
CEBU, Philippines — Anaa na unta sa mga kamot sa Pilipinas ang daog, apan giusikan nila ang talagsaong kahigayonan kay nabuhian kini nila.
Ang Philippine men's basketball team napilde sa ligas kaayo nilang duwa batok sa China, 80-82 sa nagpadayong 2018 Asian Games kagabii didto sa Jakarta, Indonesia.
Bisan pa og napilde, ang mga magduduwa sa Pilipinas nga kuwang kaayo og preparasyon angay gihapon nga daygon kay ila man nga gihatagan og maayong duwa ang powerhouse nga China.
Batok sa mga 7-footers sa China, ang Pilipinas nga gibidahan ni NBA cager Jordan Clarkson miapas gikan sa double-digit nga biya sa first period.
Si Clarkson igo lang nakauban sa ensayo sa Pilipinas og lima ka adlaw human usab sa dalidali nga paghatag og pagtugot sa NBA nga paduwaon ang Cleveland Cavaliers point guard sa Philippine team.
Gilubong og 12 puntos sa second period, 15-27, apan sa kombinasyon nilang Clarkson, Stanley Pringle ug Christian Standhardinger, ang Pilipinas nakabangon ug nakahimo pa paglabaw sa pag-abante og tres puntos, 78-75 sa katapusang dos minutos sa duwa.
Si JP Erram nakahimo og krusyal nga sipyat ug nasundan sa turnover ni Pringle sa daginutong segundos sa duwa nga maoy nakapawong sa paglaum sa Pilipinas nga makompleto ang usa unta ka 'upset' nga kadaogan.
Si Clarkson maoy nangulo sa scoring sa iyang 28 puntos, samtang sila si Standhardinger ug Pringle mitampo og 18 ug 14 puntos matag usa. Ang Houston Rockets center nga si Zhou Qi maoy mibida sa China nga mitugpo og 25 puntos ug milangkat og 12 ka rebounds.
Ang Pilipinas moabante gihapon sa quarterfinals ug ilang sangkaon ilang mortal nga karibal ang South Korea.
- Latest