Monterroyo bag-ong kampiyon sa CELBA

CEBU, Philippines – Puwerteng trilinga ang championships game sa duha ka magkaribal ang Monterroyo ug LBS kay one point ra ang ligas paghuman sa duwa.

Ang Monterroyo mipakaging sa LBS 59-58     aron  paglangkat sa titulo sa Cebu Legends Basketball Association (CELBA) Season 3 niadtong Miyerkules didto sa Canduman Housing gym, Dakbayan sa Mandaue.

Sa kahigpit sa duwa, si Michael 'The Rock'  Tañan ang nakaiskor og double figures alang sa Monterroyo sa iyang 18 puntos, apil na niini ang para daog niyang itsa.

Labaw og nuybe puntos ang LBS sa first period, 28-19, apan ang nagkamang nga Monterroyo kalit lang milabaw, 31-30 pagsugod sa second period ug didto na nagsugod ang krimen diin nagsinukliay sila og mga hait nga opensa nga miresulta ngadto sa 11 ka pag-usab-usab sa labaw sud lang sa maong kuwarter.

Padayong nagbukal ang dugo sa duha ka karibal sa sunod nga period ug anaa na unta sa mga kamot sa LBS ang daog dihang labaw sila og usa ka lugas sa nahibiling sayes segundos, 58-57, apan nakabuhi kini human si Ariel Ocier nakahimo og walay kuwenta nga foul batok ni Clark Monsanto nga naghatod kaniya ngadto sa free throw line. Palpak hinuon si Monsanto sa duha niya ka free throws, apan nakatabang hinuon kini  pagpadaog kay nakuha ni Tañan ang usik nga bola ug dayong itsa aron hatagan ang Monterroyo og 59-58 nga bentaha sa nahibiling dos segundos sa duwa.

Sa gubat alang sa ikatulong dapit, ang Butch Surveying milubong sa Explorer, 72-59 sa pagpangulo ni Ramie Suson nga miugbok og 13 puntos.

Ang Butch Surveying ni Engr. Butch Migriño ug playing coach Engr. Tony Alcover maoy nikontrolar sa duwa gikan sa pagsugod hangtod nahuman.

Miiskor sab og 13 puntos si Ai-Ai Setenta aron pangulohan ang Explorer ni Alan Buenavista.

Ang liga nag-malampuson tungod sa pagtinabangay sa mga sakop sa CELBA ubos sa liderato ni S/Insp. Dondon Coloscos sa abag nilang Ramel Baclay, Willy Medillo, Roel Tayag, Lloyd Chavez, Richard Limosnero ug Wendel Oquias.

Gipaluyohan sab kini sa Bol-anon Eatery.

Sa laing bahin, gipahibalo ni LABA president S/Insp. Dondon Coloscos ang senemanang praktis sa ballclub temporaryong ipahigayon didto sa Paknaan gym matag Lunes gikan sa alas-6 hangtod sa alas-10 sa gabii.

Pangandam kini alang sa LABA Christmas League 2018.

PUNTOS MATAG USA

Unang duwa:

BUTCH Surveying (72) - Suson 13, Herbieto 8, Pelit 8, Aligway 7, Taghoy 7, Castillo 7, Cabonelas 6, Cabucos 6, E.  Alcover 4, Mahusay 4, T. Alcover 2, Migallen 2.

EXPLORER (59) – Setenta 13, Costanilla 7, Ferolino 6, Buenavista 5, Puerto 5, Gomez 5, Ochea 4, Medillo 4, Molit 3, Amancio 3, Richlim 2, Aseo 1.

Ikaduhang duwa:

MONTERROYO (59) – Tañan 18, Amaga 7, Estremos 7, Mendoza 7, Tantuan 6, Monsanto 6, Monterroyo 2, J. Landiza 2.

LBS (58) – Villarosa 9, Ocier 9, Recto 8, Pacquiao 7, Villaronza 5, Lesin 5, Sicad 5, Budiongan 2, Rosaceña 2.