Portmen klaro na nga no. 1 sa eliminasyon sa labing unang CVBA tournament

CEBU, Philippines – Hayag pa sa udtong tutok ug klaro na kaayo nga mahimong no. 1 ang Portmen human sa elimination round sa Cebu Vintage Basketball Association (CVBA).

Kini human ang Portmen midaog batok sa Aduana sa iskor nga 71-68 niadtong Huwebes didto sa San Nicolas gym sa Tupas, Dakbayan sa Sugbo.

Kuyaw kaayong nakaduwa sila si Boodee Monteño ug Don Dejaresco diin miiskor sila og 12 puntos aron mangu sa scoring sa Portmen.

Mikawat sab og salida si Bong Tan nga mipabuhagay og 11 puntos.

Bugtong si Frime Oporto lang ang miiskor og double figures sa Aduana nga mikadlit og 16 puntos.

Pirmeng naglabaw ang Portmen, apan nahimong kulbahinam ang aksiyon dihang misikit ang Aduana sa nahibiling 13 segundos sa duwa, 70-67 sa itsa ni Cyril Gulbin, apan didto ra kutob ang maayo nilang salida kay si Tan mipasud og usa ka free throw nga maoy nagselyo sa kadaogan.

Ang Portmen makigbatok karon sa Floaters  sa katapusang adlaw sa eliminasyon. Bisan unsay resulta sa duwa, dili kini matarog sa nahimutangan sa Portmen. 

Ang dako bagahi mao ang Floaters kay kinahanglan  silang  modaog   aron moabante sa  quarterfinals, apan kon ugaling mapilde, mabulahan ang Explorers kay sila ang makaangkon sa no. 6 spot.

Sa laing bahin, ang BOC Hitz midaog pinaagi sa 'default' batok sa Dynamites.

Gumikan niini, ang BOC Hitz temporaryo karong nagsolo sa ikaduhang dapit bitbit ang 4-2 nga baraha, samtang ang Dynamites  wala na'y pag-asa nga moabante sa sunod hugna tungod sa ilang 1-5 win-loss record.

Ang liga gidumala ni Roy Canillas sa abag nilang Janno Boniao, Ferdie Sigue ug Sidney Ganapin.

PUNTOS MATAG USA

PORTMEN (71) – Monteño 12, Dejaresco 12, Tan 11, Villa 7, Avenido 7, Lambayan 6, Jovita 4, 

Canoy 2, Nadal 2.

ADUANA (67) – Oporto 16, Gulbin 9, Taladua 9, Generalao 8, B. Medalle 6, Belarmino 5, Bukiron 

4, Boniao 4, Villahermosa 2.