Pacquiao gidayeg ni Roach
CEBU, Philippines – Kanhi trainer ni Manny Pacquiao nga si Freddie Roach nakadayeg og maayo sa Pinoy boxing icon human sa 'knockout' nga kadaogan niini batok ni Argentinian Lucas Matthysse aron masakmit ang WBA welterweight title niadtong Domingo didto sa Axiata Arena sa Kuala Lumpur, Malaysia.
Si Roach nga wala na kuhaa pa ni Pacquiao isip head trainer, mitug-an nga mitan-aw siya sa telebisyon sa maong away diin nakita niya nga anaa gihapon ang kapaspas ni Pacquiao hinungdan sa kadaogan niini batok ni Matthysse.
"Manny's speed has always been there. It never left him. His speed is a big asset and it helped him so much in that fight," matud pa sa Hall-of-Famer trainer sa fighthype.com.
Mao kadto ang labing unang higayon nga si Pacquiao midaog pinaagi sa 'knockout' sukad iyang gipahagba si Miguel Cotto sa ika-12 nga hugna sa ilang WBO/WBC welterweight championship niadtong Nobiyembre 14, 2009 didto sa MGM Grand sa Las Vegas.
Gidungog nga miaslom ang relasyon sa duha hinungdan nga nagbuwag ang ilang dalan, apan ang American trainer ug si Pacquiao wala mibuhi bisan usa ka bati nga pamahayag batok sa usa'g-usa.
- Latest
