10 ka Gilas players gisuspenso
CEBU, Philippines — Ang Gilas Pilipinas ug Samahang Basketbol ng Pilipinas (SBP) maoy nagrabihan nga naigo sa silot gikan sa FIBA tungod sa nahitabong rambol batok sa Australia niadtong Hulyo 2 sa 2019 World Cup Asian qualifiers didto sa Philippine Arena.
Human sa pipila ka semana nga pagtimbangtimbang, ang FIBA mipakanaog sa ilang hukom diin 10 ka players sa Gilas uban ang head coach nga si Chot Reyes ug assistant niining si Jong Uichico ang gipangsuspenso.
Labing dako og silot si Calvin Abueva kay dili kini makaduwa og unom ka FIBA qualifier games, samtang sila si Roger Pogoy, Carl Bryan Cruz ug Jio Jalalon gipahamtangan og five-game suspension. Sila si Terrence Romeo, Jayson Castro, Andray Blatche ug Troy Rosario gidid-an sab sa pagduwa og tulo ka duwa, samtang sila si Japeth Aguilar ug Matthew Wright gipahamtangan lang og usa ka duwa nga suspensiyon.
Wala hinuon maapil pagkasuspenso sila si JuneMar Fajardo, Gabe Norwood ug Abu Tratter.
Si Uichico, kinsa miapil sa karambola gisuspenso og tulo ka duwa, samtang usa ka duwa nga suspensiyon ngadto ni Reyes tungod sa pakyas niya pagkontrolar sa iyang mga batos. Si Reyes kinahanglan usab mobayad og multa nga tunga sa milyon ka pisos.
Gipahamtangan sab og silot ang SBP tungod sa dili maayong panghitabo sa ilang balwarte.
Ang SBP gipabayad og P13.3 million sa kadaot nga namugna sa rambol ug ang sunod duwa sa Gilas dinhi sa Pilipinas dili na usab ipasalida ug walay fans ang patan-awon.
Sa habig sa Australian, si Daniel Kickert nga maoy pabilo sa kagubot human gisiko si Pogoy, gisuspenso og lima ka duwa, samtang ang NBA center nga si Thon Maker dili paduwaon og tulo ka duwa ug si Chris Goulding usa ka duwa nga suspensiyon.
Ang Basketball Australia gipabayad usab og 100,000 swiss franc o kapin sa lima ka milyon ka pisos.
Si FIBA secretary general James Klotz mi-ban usab og usa ka tuig sa mga referees nga nidala sa maong duwa.
"FIBA wishes to emphasize that it condemns any form of violence, both on and off the court. Respect, sportsmanship and professionalism are expected from players, coaches, officials and all other stakeholders at every game. Moreover, host countries must ensure the highest standards of organizational conditions are in place to guarantee the safety and well-being of players and other participants at all times,” tipik sa pamahayag sa FIBA.
- Latest