Fajardo napili na sab isip 'Player of the Week'

CEBU, Philippines —  Ang MVP nga si JuneMar Fajardo mibira sa ikaduha niyang Cignal-PBA Press Corps Player of the Week award sa Commissioner's Cup 2018.

Ang 6-foot-10 nga si Fajardo mi-average og 21.0 points, 11.3 rebounds, 2.3 steals ug 2.0 assists aron sakmiton ang senemanang pasidungog diin iyang gipilde ang karibal niyang si Greg Slaughter sa Barangay Ginebra.

Ang garbo sa Pinamungajan, Cebu misikad sa playoffs pinaagi sa pagpupo og 27 puntos uban ang 13 ka rebounds sa dihang ang Beermen  mibangon human malubong og 24 puntos sa first half dayon na ngadto sa pagpakaging sa TNT KaTropa, 121-110 sa Game 1 sa ilang quarterfinal series.

Duha ka adlaw ang milabay, nagpadayon ang kainit sa 28-anyos nga si Fajardo diin siya mirehistro og 19 points, 12 ka rebounds ug upat ka steals sa ilang pagkumpleto og duha ka duwa nga sweep sa KaTropa, 106-102.

Dili gihapon mabangbang ang dinuwaan sa four-time league MVP nga miiskor og 17 points, siyam ka rebounds ug duha ka steals atol sa  92-79 nga kadaogan sa Beermen batok sa Alaska Aces sa Game 1 sa ilang 'best-of-five' semifinal series niadtong Sabado.

Gitiwasan pa sa Beermen ang Aces sa iskor nga 105-94 niadtong Lunes aron pagposte og 2-0 nga bentaha sa ilang serye.