Accenture, Sykes, Teleperformance 2-0 na sa E-Leagues

CEBU, Philippines — Sila si Junas Marion Misa, Archie Brian Vincent Batua, Miguel Lorenzo Calo ug Mark Vincent Cabague misalida sa dihang gipaak sa Accenture Sharks ang ePerformax Reds, 90-80, sa Tanduay Athletics E-Leagues for Basketball Season 14 niadtong Sabado didto sa City Sports Club-Cebu Gym.

Si Misa mitapos uban ang 16 puntos, si Batua mitali og 14, samtang sila si Calo ug Cabague nagkumboya og 22 puntos alang sa Accenture, nga nakigsawo karon sa liderato uban sa Sykes Pioneers ug Teleperformance Vipers sa Elite Classic bitbit ang managsamang 2-0 records.

Ang Sykes mipahilom sa Wipro Tigers, 73-65, samtang ang Vipers mipayaka sa Telstra-Teletech Boomerangs, 84-62.

Si Jan Michael Auditor maoy nangu sa Sykes uban ang 27 puntos, samtang si Earldred Cesar Montilla miamot og 19 puntos.

Samtang ang Vipers nakapasol og tinigum nga 37 puntos gikan nilang Dean Junber Escalon, Jayper San Villanueva Brigoli ug Germain Jo Michael Guarisma.

Sa bugtong duwa sa EVO League, si Robert Rebano maoy nangu sa balanseng ataki uban ang 21 puntos sa dihang gibuntog sa Tech Mahindra Tech Mighties ang SSI Research Now Warriors, 73-64, alang sa ikaduha nilang sagunson nga daog. (BANAT NEWS)