Gov's cup finals banatan na
CEBU, Philippines — Sugdan na sa Talisay City Aquastars ug San Francisco sa isla sa Camotes Island ang ilang best-of-three finals series sa Governor's Cup Inter-Cities and Municipalities Under-21 Developmental Basketball Tournament karong adlawa diha sa Talisay City Sports Complex.
Ang Talisay maoy naka-angkon og katungod nga mo-host sa primerong duwa sa serye bugti sa way tatsa niining 12-0 record.
Makigharong ang Aquastars batok sa SanFran sa alas-8 sa gabii, human sa tinagakay nga duwa alang sa ikatulong dapit tali sa Consolacion Sarok Weavers ug Sibonga Pillars sa alas-6 sa gabii.
Seguradong magsinukdanay una sa ilang abilidad ang Talisay ug ang SanFran gumikan kay mao pa lamang kini ang labing unang higayon nga sila mag-engkuwentro sa liga nga gipasiugdahan sa Cebu Provincial Sports Commission (CPSC) ubos sa pagtimon sa tsirman niining si Michel J. Lhuillier ug executive director Atty. Ramil P. Abing.
Ning higayona, tsansa na sab nilang mosidlak ilabi na kay nahanaw na sa eksena ang nakampiyon sa miaging tuig nga Consolacion ug Minglanilla.
Aron mapahayagan ang ilang tsansa nga sakmiton ang P500,000 nga ganti, ang Talisay gikinahanglan nga makapahimus og maayong duwa gikan nilang Jay Deiparine, Elmer Echavez, Ronan Briones, Kendrick Abarquez ug Keaton Clyde Taburnal.
Samtang ang SanFran sa gihapon magsandig sa ilang Big 3 nga gilangkoban nilang Kenny Rogers Rocacurva, William Plenos, Jr. ug Jake Lawrence Gonzales aron motimon kanila ngadto sa giambisyon nilang korona.
Ang Game 2 molabyog ngadto sa SanFran sa Camotes karong Hulyo 18, samtang ang Game 3, kon gikinahanglan, duwaon karong Hulyo 20 diha sa Cebu Coliseum. (BANAT NEWS)
- Latest
