Pinas nakatulo ka world champs sa 3 ka adlaw

KUALA LUMPUR, Malaysia — Sa usa ka dungog nga lagmit masulat sa kasaysayan,ang Pilipinas nakahulma og tulo ka world champions sud lamang sa tulo ka adlaw.

Ang una mao si Vic Saludar, nga mipakurat sa Hapon nga si Ryuya Yamanaka pinaagi sa unanimous decision sud sa 12 ka hugna aron paglangkat sa WBO minimumweight title niadtong Biyernes sa gabii didto sa Central Gym sa Kobe, Japan.

Ang kadaogan ni Saludar daw sa nag-abli sa pultahan sa dugang mga nindot nga balita alang sa mga Pinoy.

Duha ka adlaw ang milabay, ang garbo sa Sugbo nga si Jhack Tepora sa IPI-Omega Gym mikuha og atensiyon human iyang gipalukapa ang Mehikanong si Edivaldo Ortega sa ikasiyam nga hugna aron pagsakmit sa WBA featherweight belt sa undercard sa 'Fight of Champions' tali nilang Manny Pacquiao ug Lucas Matthysse sa Axiata Arena dinhi kagahapon.

Si Pacquiao maoy mibutang sa naandan nga 'icing' sa victory cake sa mga Pinoy human iyang gipalayas si Matthysse sa iyang trono pinaagi sa 7th round knockout aron paghari isip bag-ong WBA welterweight champion.

Gikan sa usa, ang gidaghanon sa reigning Pinoy world boxing champions kalit nga mitubo ngadto sa upat.

Ang lain mao si IBF super flyweight king Jerwin Ancajas, nga gikatakda nga manalipod sa iyang trono sa ikaunom nga higayon batok ni Alejandro Santiago sa Mexico o ni Miguel Gonzalez sa Chile karong Septiyembre 14 sa Fresno, California. (BANAT NEWS)