Damgo ni Tepora natuman

KUALA LUMPUR, Malaysia — Ang way pildeng Sugbuanong boksidor nga si Jhack 'El Capitan' Tepora mipatikangkang ni Edivaldo 'Indio' Ortega sa Mexico sa  ikasiyam nga hugna aron paglabni sa WBA featherweight belt sa undercard sa sangka nilang Manny Pacquiao ug Lucas Matthysse kagahapon dinhi sa Axiata Arena.

Human sa dili kaayo nindot nga sinugdanan apil na ang kalugak sa iyang depensa hinungdan nga kanunay siyay malutsan sa mahait nga counter-punch  ni Ortega, si Tepora nagsugod pagpundo og igong kompiyansa sa iyang kaugalingon sa ikalimang hugna.

Sukad iyang giablihan ang ikaunom nga hugna pinaagi sa pagpatugpa og sunod-sunod nga suntok ngadto sa ulo ni Ortega, hingpit nang gikontrolar ni Tepora ang away hangtud sa ikasiyam nga hugna diin iyang gipatumba ang Mehikano sa labing unang higayon pinaagi sa usa ka makusog nga right uppercut.

Nakabangon ra hinoon si Ortega apan si Tepora wala na mag-usik pa bisan og usa ka segundo aron tiwasan ang iyang kontra.

Nakapanimaho og dugo, si Tepora milandig og nagkadaiyang mga suntok ngadto sa ulo ug tiyan nga nakapabungog ni Ortega.

Ning puntoha, si reperi Roberto Ramirez, Jr. dali nga mihunong sa away aron paglikay ni Ortega sa dugang kadaut.

Gumikan niini, giinat ni Tepora ang mainit niyang ratsada ngadto sa 22-0 uban ang 17KOs, samtang si Ortega natagak ngadto sa 26-2-1 uban ang 12KOs.

"Lipay kaayo ko nga akong nakab-ot ang akong damgo," matud pa ni Tepora sa dihang eksklusibong nahinabi sa Banat News sa ringside human sa iyang kadaogan. "Nagagikan ko sa pobre nga pamilya mao nang nangambisyon gyud ko nga ma-world champion. Malipayon ko ug blessed kaayo ko nga karon gihatag kini nako sa Ginoo."

Ang pambato sa IPI-Omega Gym nagkanayon nga kabahin gyud sa ilang taktika ang magpasensiya ug mobirada lamang para knockout kon dunay tsansa.

Mao kini ang kapalaran nga mitugdon sa iyang mga palad.

"Lig-on pud kaayo siya nga kontra. Naa sa akong huna-huna nga pildihon siya apan wa ko mag-expect nga ako siyang ma-knockout," kanayon pa ni Tepora, nga nagdako sa dakbayan sa Sugbo, nagtubo sa Liloan ug karon nagpuyo na sa iyang balay sa Sabang, Danao City uban sa iyang kapikas nga si Dinah. (BANAT NEWS)