San Francisco nanuktok sa Gov's Cup North finals

CEBU, Philippines – Nakaikyas ang San Francisco sa makutas nga duwa batok sa Medellin, 77-74 ug usa na lang ka daog aron hingpit nang mosulod sa North Division finals sa 2nd Governor's Cup Inter-Cities and Municipalities Under-21 Developmental Basketball Tournament niadtong Miyerkules sa gabii didto sa Mandaue City Cultural and Sports Complex.

Samtang sa pagsulat ning taho kagabii, ang San Francisco  nakig-pinaksitay pa sa defending North champion Consolacion Sarok Weavers sa usa sa duha ka krusyal nga mga duwa nga maoy modeterminar kon kinsay mag-abot  sa  North  finals.

Sa laing duwa magtige ang Medellin ug ang Bantayan Seamasters.

Human gipakuratan sa Medellin niadtong Martes, 77-80, ang Consolacion mipabuhi pa sa ilang kampanya nga madepensaan ang ilang korona human gilubong ang Bantayan, 98-82.

Samtang ang Medellin hayag na untang mosud sa finals kon ila pang nabihag ang San Francisco.

Apan ang San Francisco hinuon maoy midaog ug nakabaton og  2-0 nga bentaha nga nagbutang kanila sa maayong posisyon alang sa luna sa finals.

Sa ilang pagpayaka sa Medellin, ang San Francisco nagsandig sa pagkamabayanihon ni Kenny Rogers Rocacurva nga milansang og krusyal nga tres puntos sa katapusang 34 segundos nga maoy nahimong yawi sa ilang kalampusan.

Si Rocacurva mikadlit og 27 puntos, samtang si Jake Laurence Gonzales dunay 22 puntos alang sa San Francisco.

Si Fritz Saladaga mibahog og 22 puntos, apan si Gelmart Umpad nalimitahan ngadto lamang sa 10 puntos hinungdan sa pagkahisukamod sa Medellin.