Jason Arquisola haligi sa Bayugan basketball

CEBU, Philippines — Ginagmay man o dinagko nga liga, anaa sa kanunay ang suporta ni Jason Arquisola.

Kini gumikan kay nagtanom na sa iyang dughan gikan sa gamay pa siyang bata ang pagpangga sa duwang basketball.

Usa sa mga mahinungdanon niyang nakab-ot mao ang way sipyat niyang pagsalmot sa Bayugan Inter-Collegiate Basketball Invitational nga gipasiugdahan ni Mayor Kim Lope A. Asis sud sa walo na ka sagunson nga tuig.

Sukad kini nahimugso niadtong 2011, si Arquisola way palta sa pagtunol sa iyang suporta sa liga.

“Kon naa koy team, siyempre gusto gyud ta nga modaog. Pero sa Bayugan wa pa gyud ko makadaog og championship bisan kausa mao nang apil gihapon ko pero wa nako mag-expect niana,” dason pa ni Arquisola dala ang pakatawa.

Bisan tuod og wala makuhit ang iyang gihandum, dili malimod nga si Arquisola usa ka lig-ong haligi sa maong tinuig nga torneyo nga maoy labing dako sa Vis-Min region.

Ubos sa bandila sa SG ARQ Builders, ang ilang kompanya nga nagrepresenta sa pangan sa iyang mga ginikanan nga sila si Stephen ug Grace, si Arquisola maoy nagpaluyo sa Lyceum Polytechnic Univesity (LPU) Pirates sa 8th Mayor Kim Lope Asis Basketball Invitational karong Hunyo 26-29 didto sa Bayugan City, Agusan del Sur.

“Usa sab ni ka paagi nga makatabang ta sa ilang programa sa sports, ug malipayon ko nga kabahin ko niini,” matud pa sa 34 anyos nga si Arquisola.

Naglatay gyud sa iyang kaugatan ang basketball.

Sa Sugbu, si Arquisola aktibo nga nagsuporta og mga liga, partikular ang tinuig nga Emil’s Cup sa Minglanilla nga naghatag og tsansa sa bagang panon sa commercial players nga makawadwad sa abilidad.

Sa kaugaligon niyang paagi, si Arquisola mitabang sab sa 12-time champion University of the Visayas (UV) Green Lancers ug ingon man sa manghud niining Baby Lancers sa Cebu Schools Athletic Foundation, Inc. (CESAFI).

Si Arquisola usa sab sa mga corporate backers sa Zamboanga Valientes sa Maharlikaa Pilipinas Basketball League (MPBL) nga gitukod ug gipadagan ni Pinoy sports icon Manny Pacquiao.

“Passion lang gyud seguro ni nako ang basketball. Hasta ako wala kasabot basta basketball na gani, support dayon ko. Pero kuntento ko ug malipayon sa akong gibuhat,” batbat pa ni Arquisola.

“Og ang akong team giisip nako nga pamilya sila dili lamang mga players.”

Ang mas dalaygon mao nga ang suporta ni Arquisola way kinutoban.

“Dili ta makasulti pero hangtud nga mahimo pa nako, dili ni moundang ako suporta sa basketball,” saad pa ni Arquisola. (BANAT NEWS)