Talisay, Sibonga nanoktok sa South Finals
CEBU, Philippines — Kadaogan maoy misugat sa Talisay City AquaStars ug Sibonga pagsugod sa South Division semifinals sa 2nd Cebu Governor’s Cup Inter-Cities and Municipalities Under-21 Developmental Basketball Tournament didto sa Alegria municipal gym niadtong Sabado sa gabii.
Nagkayo gikan sa sinugdanan, ang AquaStars milampornas sa Barili, 113-88, samtang ang Sibonga mipayaka sa Alegria, 101-88.
Ang Talisay ug Sibonga mahimo nang moangkon og luna sa final kon ugaling modaog sila batok sa tagsa-tagsa nila ka mga kontra karong gabii.
Wala na molingi pa ang Talisay sukad miposte og sayong 25-14 nga labaw. Mitagak sila og 25-14 nga bomba sa ikatulong kuwarter sa wala pa gitiwasan ang Barili, 33-28, alang sa 25 puntos nga demolisyon.
Si Elmer Echavez maoy nangu sa Talisay uban ang 20 puntos, si Ronan Briones midugang og 16, samtang sila si Keaton Clyde Taburnal ug Jay Deiparine nagkumboya og 27 puntos.
Sa main game, ang Alegria maoy unang naglabaw, 20-13, apan ang Sibonga, gumikan sa mainit nga mga kamot nilang Andres Regidor ug Ehman Ronen Suarez milusad og 33-19 run aron pag-ilog sa labaw atol sa halftime, 46-39.
Misalida sab dayon sila si John Bryle Cuyos ug Frederick Rosales sa ikatulong kuwarter diin ilang giwani ang Alegria, 25-15, aron sa hingpit nilang pagkontrolar sa duwa, 71-54.
Sila si Cuyos ug Regidor mitali og 21 puntos matag usa, si Suarez mikadlit og 18 puntos, si Rosales midugang og 15 samtang sila si Gerald Ignacio ug John Klarenz Sonsona nagkumboya og 22 puntos sa balanseng ataki sa Sibonga. (BANAT NEWS)
- Latest
