Triple-A President's Cup semis banatan karon

CEBU, Philippines — Seguradong hugot nga duwa ang masaksihan sa upat ka teams nga nangam-bisyon makakuha og lingkoranan sa finals sa  Allied Athletic Association (Triple-A) President's Cup Basketball Tournament 2018.

Kini gumikan kay ang semifinals banatan na karong adlawa  diha sa Kimwa gym sa Subangdaku, dakbayan sa Mandaue.

Sa unang duwa nga gitakda sa alas-8:30 sa buntag, ang Explorer ni ballclub president Alan Buenavista moharong sa D' Lurics Enterprises ni vice president Dodong Lurica, sundan dayon sa duwa tali sa AC Troopers ni S/Insp. Dondon Coloscos ug Sniper ni Gilbert Lesin inig ka alas-10.

Ang mga modaog maoy mag-abot sa kampiyonato ug ang mga pildero mag-ilog na lang alang sa ikatulo nga puwesto.

Balanse ang tapad sa duha ka duwa ug dili matag-an kun asa mapunta ang daog.

Ang Explorer magsalig nilang Rechel Bamba, Apet Cabahug ug Mai Suson.

Gawas sa tulo, ang Explorer makalaum sab nilang Lloyd Chavez, Johnrey Gorgonio, Ramil Estremos ug Roy Abong.

Samtang ang D' Lurics ni coach Dodong Taborado magsalig sab nilang Robert Cuerbo, Canjo Echavez ug Jun Arceo. Apan kinahanglan nila ang suporta sa ilang kaubanan ilabi na nilang Dodong Lurica, Geryl Bukiron ug Joshua Yu aron makuha ang lingkoranan sa finals.

Sa laing bahin, ang AC Troopers nga gisuportahan sab ni Jason Pestaño, tinguha nga motiklo og daog, apan dili sayon ang ilang  misyon kay ang sangkaon nila ang notadong Sniper.

Ang AC Troopers maghangad sa sentro nilang si Opong Englis, Raul Mahusay ug sa mga tirador nga silang Noel Ferolino, Florentino Ecot ug Joel Cabahug.

Kinahanglan sab nga mosalida sila si Coloscos, Pestaño ug Wendel Oquias aron ilang mabuntog ang Sniper nga pangulohan nilang Gilbert Lesin, Erwin Budiongan, Alexam Amaga ug Jhonnel Escober.