Tinagsip sa NBA
Howard gi-trade sa Nets
Miuyon ang Charlotte Hornets nga i-trade si eight-time All-Star Dwight Howard ngadto sa Brooklyn Nets puli ni Timofey Mozgov.
Isip dugang pabor, ang Hornets maoy mokuha sa second-round pick sa Nets sa NBA Draft nga gikatakda karong adlawa ug ingon man laing second-round pick sa 2021.
Ang maong lakang sa Hornets naghiusa pagbalik ni Mozgov ug Mitch Kupchak. Si Kupchak nga bag-o lang gikuha isip general manager sa Hornets maoy mipapirma ni Mozgov og upat ka tuig nga kontrata nga mibalor og $64 million niadtong 2016 sa dihang silang duha anaa pa sa poder sa Los Angeles Lakers.
Wizards batok Knicks sa London
Ang NBA mobalik sa London sunod tuig alang sa usa ka regular-season game tali sa Washington Wizards ug New York Knicks. Mag-abot ang duha ka koponan sa Enero 17, 2019 didto sa O2 Arena.
Mao kini ang ikasiyam nga regular-season game sa liga didto sa London. Ang Knicks duha ka higayon na nga nakaduwa didto diin ilang gikasangka ang Detroit Pistons niadtong 2013 ug ang Milwaukee Bucks niadtong 2015.
Samtang ang Wizards mopakita'g aksiyon sa labing unang higayon didto sa Britanya.
- Latest