Sharks mo-debut karon sa MPBL

CEBU, Philippines – Sa labing unang higayon, ang Cebu City Sharks mopakita na og aksiyon sa  Maharlika Pilipinas Basketball League batok sa Bacoor Strikers sa MPBL Datu Cup karong adlawa didto sa Muntinlupa Sports Complex.

Gipaluyohan sa Active Casino sa International Pharmaceuticals, Inc. (IPI), ang Sharks makigtakus batok sa Bacoor Strikers sa alas-7 sa gabii sa dili pa ang Muntinlupa Cagers mo-host sa Marikina Shoematers sa main game nga gikatakda sa alas-9 sa gabii.

Gipangulohan ni ex-pro Jondan Salvador, ang Sharks ni coach Gilbert Castillo   gilangkuban  sa kanhi mga bitoon sa Cebu Schools Athletic Foundation, Inc. (CESAFI) nga sila si John Abad, Harold Cincoflores, Rhaffy Octobre, Alfred Codilla, Cesar Catli, Franz Around, Ian Ortega, Enrico Llanto, Victor Nuñez, William McAloney,  Jovanie Luz, Kevin Villafranca ug Garciano Puerto.

Nagkumpleto sa 18-man  Sharks  line-up mao  sila  si    Patrick Jan Cabahug, Mark Abadia, Harold Cortes, Iron Suano ug Frederick Rodriguez.

Ilang sangkaon ang Strikers nga gipangulohan ni three-time PBA champion ug seven-time All-Star Marlou Aquino.