Phoenix Suns interesado sab mokuha sa serbisyo ni Leonard
CEBU, Philippines – Nagkadaghan karon ang mga koponan nga gustong mokuha sa serbisyo ni All-Star Kawhi Leonard nga naglaraw mohawa sa San Antonio Spurs.
Human sa Los Angeles Lakers, Philadelphia 76ers ug Cleveland Cavaliers, ang Phoenix Suns mao karon ang labing uwahing koponan nga bukas sa ideya nga makig-trade sa Spurs alang ni Leonard.
Ang Suns adunay dakong tsansa nga makakuha ni Leonard ilabi na nga sila ang nanag-iya og katungod nga mokuha sa No. 1 pick sa umaabot nga rookie draft.
Giatngan ang nagsingabot nga drafting tungod kay gilangkuban kini sa mga NBA star prospects gikan sa college ug Europa.
Hinuon, sa taho sa hoopshype.com, ang kadagkoan sa Suns nagpanagana usab tungod kay posible nga mobiya ra usab dayon si Leonard sa koponan ilabi na nga dili pa kaayo solido ang line-up niini ug dili pa makasaad nga makasulod sa playoffs.
Sa laing bahin, ang Cavaliers gikataho usab nga makig-negosasyon sa Charlotte Hornets aron mabira ang star point guard nga si Kemba Walker.
- Latest