Hinunangan nagpanikad sa 2 makasaysayanong events
CEBU, Philippines — Ang tibuok komunidad sa Hinunangan didto sa Southern Leyte naglantaw sa duha nila ka mga makasaysayanong events nga napuno sa kadasig ug kahinam.
Kapin sa tunga ka milyon ka pisos ang idalit sa labing unang ‘Hinunangan Marathon’ ug ‘Hinunangan Baroto Regatta’ nga mahitabo karong Hunyo 24 isip tipik sa selebrasyon sa ika-165 nga pagkakaplag sa lungsod sa Hinunangan.
“We are all upbeat because of this momentous activity in our place,” matud pa ni mayor Reynaldo Fernandez sa Hinunangan LGU, nga maoy nagpasiugda sa maong kalihukan agig pagtambayayong ni Southern Leyte Rep. Roger Mercado, Hilongos Mayor Jay Roble, ug Philippine Sports Commission (PSC) pinaagi ni commissioner Ramon ‘El Presidente’ Fernandez.
“We will do our very best to make it a memorable and meaningful experience for all the participants to remember in their lifetime.”
Susama sab ang pasalig ni kanhi Customs district collector David ‘Kuya Boy’ Odilao Jr., nga maoy utok sa pagdala sa maong duha ka events didto sa yuta niyang natawhan.
“It’s quite challenging given the magnitude of these events,” dason pa ni Odilao, ang giila nga amahan sa Sinulog ug "Bahug Bahug sa Mactan".
“But I can guarantee this will be a huge success,” dugang pa ni Odilao.
Sa marathon, dul-an sa P300,000 nga ganti ang iapud-apud sa mga mananaog.
Gawas sa tropeyo, ang makampiyon modawat sa men's 42km race modawat og P30,000, samtang ang women's top finisher mobulsa og P20,000.
Ang makampiyon sa 21km dunay P10,000 matag usa, samtang ang manghawod sa 9km makabira og P8,000.
Ang rehistrasyon nagkantidad og P500 sa 9km, P1,000 sa 21km, ug P1,500 sa full marathon.
Mahimong magparehistro sa Hinunangan Mayor's Office, Southern Leyte Provincial Capitol, ug sa Philippine Sports Commission (PSC)-7 office diha sa Cebu City Sports Center.
Alang sa dugang impormasyon, kadtong mga interesado mahimong mokontak ni Kuya Boy Odilao (0915-1429580/0922-3942349) o ni race director Joe Deresas (0933-5484858). (BANAT NEWS)
- Latest
