Bisitang paddlers maoy nanghawud
CEBU, Philippines — Ang mga out-of-town paddlers gikan sa Dumaguete ug Iligan maoy midominar sa 1st Cebu City Dragonboat Festival kagahapon didto sa Il Corso, City di Mare sa South Road Properties.
Ang UMAGU Dragon Boat Team ug Dumaguete Yellowfins maoy midaog sa kampiyonato sa 300m women's event ug Open category.
Ang UMAGU misutoy sa finish line sud sa usa ka minuto ug 33.61 segundos aron makuha ang korona sa women's gisundan sa Yellow Fins (1:33.92), samtang ang Sugbu Mighty Dragons mipahiluna sa ikatulo sa oras nga 1:34.
Namawi hinuon ang Yellowfins sa open category dihang sila maoy labing paspas sa oras nga 1:18, mas paspas og usa ka minuto sa Pundok Amila (1:19) ug Bohol Paddlers (1:19.8) nga maoy second ug third placers.
Sa small boat race, ang Bakunawa Dragon Boat Team sa Iligan maoy labing paspas sa oras nga 1:26. Gisundan sila sa Bohol Paddlers (1:27) sa ikaduha, samtang ang Hilera Team sa Dumaguete milabni sa ikatulo sa oras nga 1:27.9. (BANAT NEWS)
- Latest